Saman i stoltheit og glede

Gratulerer med 900-årsjubileet for kyrkja i Rogaland! Saman feirar vi kva rolle kyrkja har hatt for enkeltmenneske og samfunn opp gjennom århundre i vårt fylke. – Eg håper jubileet skaper stoltheit og glede, seier biskop Anne Lise Ådnøy.

– Jubileumsglede skal som all anna glede bli delt med flest mogeleg! I starten av dette jubileumsåret er eg fylt av glede og takk, fortel Ådnøy. – Ei festhelg er allereie gjennomført med stil i de to prostia i Stavanger by. Ingen tvil om at kyrkjemedlemmer og innbyggarar har fått med seg det som skjer. Det har vore overveldande stor oppslutning om dei ulike arrangementa.

Nå gler biskopen seg til å reise rundt i bispedømmet og feire jubileet saman med sokna. Gjennom året skal kvart prosti arrangere ei festhelg med ulike tilbod og møtepunkt som aktualiserer kyrkja i lokalsamfunnet, og Anne Lise Ådnøy blir med på alt saman.

– Eg ser særleg fram til jubileumsgudstenestene i desse festhelgene, og håper å treffe mange folk frå heile fylket!

– Alle treng å bli sett og invitert inn

«Saman» er overskrifta for kyrkja si jubileumsfeiring, og temaet går som ein rød tråd gjennom alle prosjekta i jubileet.

– Vi treng kvarandre som enkeltmenneske og som samfunn, og vi treng alle å bli møtt som medmenneske. Saman skal vi bygge fellesskap og identitet, seier prosjektleiar for kyrkjejubileet Inger Vagle.

Som ein del av Saman-satsinga blir sokna oppfordra til å invitere til gjestebod, der kyrkja inviterer til eit enkelt måltid i samarbeid med lokale aktørar som fotballklubben, frivilligheitssentralen, skolen, kulturskolen eller andre i nærmiljøet.

– Målet er å utvide kjennskapen vårt til lokalmiljøet og senke terskelen for å snakke med kjente og ukjente i nabolaget. Alle treng vi å bli sett og invitert inn i fellesskap, og alle kan vi og vere med å invitera inn. Kanskje akkurat du har lyst å arrangere gjestebod? utfordrar prosjektleiaren.

Jubileumsbåten bind bispedømmet saman

Heilt frå Egersund sitt 400-årsjubileum i pinsen 2023, har kyrkja sin jubileumsbåt reist mellom sokna i bispedømmet. Færingen som blir brukt som stafettpinne er utlånt frå Engøyholmen kystkultursenter. Den har eit seil der kvart sokn kan sette merket sitt.

– Takk til alle sokn som har satt sine «segl» på seglet! Nå begynner det å bli fullt, og vi kan sjå det vakre i at vi høyrer saman i kyrkja, seier biskopen.

– Mange gode assosiasjonar kan knytast til å vere i same båt. Også Andens vind blir konkret og synleg i båt-motivet. Takk til misjonærar, vikingar og vår første biskop, Reinald frå Winchester, som delte ordet om Jesus med området vårt. Aller mest takk til Gud for det levande Ordet som gir glede og håp kvar dag, avsluttar Anne Lise Ådnøy. Vil du lese meir om jubileet og den 900 år lange historia? Gå til www.kirken.no/jubileum2025

Tekst og foto: Stavanger bispedømme

Publisert 28. februar 2025 kl: 08:43, oppdatert 28. februar 2025 kl: 08:43, av Ronny Myksvoll